懶理白色情人節 阿信屋:Kawaiiland長期八折

一年大小節日係商家搵真銀的機會，每年聖誕節、情人節一眾商家例必「借題發揮」爭相推出優惠。不過，CEC國際（759）旗下阿信屋，早於上年4月決定棄搶攻呢類「兵家必爭」節日，好似聽日係白色情人節咁，阿信屋亦冇特別準備。老闆林偉駿︰「白色情人節？有啲咁嘅節嘅咩？」

「同節日好大關係嗰啲，我地都盡量減，新年我地連禮盒都唔做，農曆、聖誕基本上無做特別的禮盒。」老闆話想專注做街坊日常生意，「呢啲時間佢哋花好多精神去佈置，我地有190幾間分店，如果要搞節日嗰啲氣力好大。我將自己當係一間士多咁，士多唔會聖誕特別貼啲嘢出嚟㗎嘛？」。不過佢就話，聖誕節、情人節生意無特別好或特別差。

另一方面，阿信屋上年年尾開咗第一間化妝品店Kawaiiland，上月尾再多開一間，不計會員優惠，貨品零售價與莎莎（178）等連鎖化妝品店相若，部份貨品定價更較同業為高，不過林老闆就反駁話，依家長期做八折促銷，點都抵過人。

阿信屋平價搶客呢條路，令對手恨得牙癢癢，而定價太低亦會令供應商卻步「我入呢行（化妝品），面價我唔能夠太低。我都想拎多啲唔同的貨，我驚將個面價定得太低令供應商難去交代，惟有襯開新舖全線優惠八折。依家每月開一間，其實係長期八折，係取巧，我地係八折先抵過人地。」


[img]http://static.apple.nextmedia.com/images/apple-photos/video/20140314/org/1394742784_853e.jpg[/img]


來源:蘋果日報網站