馬雲老友「出賣」阿里 引入老虎基金　史玉柱勁賺三倍

所謂商場冇父子，更何況老友？舊年底美國老虎基金喺二手市場買入2億美元（15.6億港元）阿里巴巴股份，沽家身份一直係個謎。謎底噚日解開，原來沽家正是阿里巴巴創辦人馬雲老友──網遊公司巨人集團大股東史玉柱。
巨人喺美國上市，前日自爆以1.99億美元出售阿里股份畀老虎基金，但詳情欠奉，冇股數。巨人2011年買入5,000萬美元嘅阿里股份，若果買賣股數一樣，即兩年幾有三倍回報，都幾和味。呢單刁仲將阿里嘅估值推高至9,750億港元。

電腦奇才　曾身敗名裂
港人唔多認識史玉柱，佢其實幾傳奇，佢係中國早期最出色嘅電腦程序員之一，1980年代尾靠幾千元貸款創立巨人集團，研製電腦軟件賺得第一桶金，但少年得志兼被勝利沖昏頭腦，學人搞地產，喺珠海興建號稱全國第一高嘅巨人大廈，後來遇上中央宏觀經濟調控等因素令佢身敗名裂，一度喺商業界人間蒸發。
千禧年佢東山再起，全力催谷「腦白金」保健品，「腦白金」幫史玉柱賺得第二桶金，之後佢轉搞網絡遊戲，短短三年成為全國三大網絡遊戲商之一。巨人喺2007年走到美國上市，可惜當年阿里巴巴在港上市，巨人風頭被阿里搶晒。
雖然係咁，史玉柱同馬雲依然好老友，前者仲不時喺馬雲嘅來往扎堆（類似專頁）留言，幫手做宣傳，照計史玉柱呢次賣股，唔似反目，而係幫手引入新股東喎。

[img]http://static.apple.nextmedia.com/images/apple-photos/apple/20140213/large/13by01p.jpg[/img]
■史玉柱同馬雲好老友，佢周不時會去馬雲個來往專頁留言幫手宣傳。　互聯網


來源:蘋果日報網站