青心直說：感謝艾維朗

[size=5]美股港股輪流結束 3日升勢，連地震前裂縫都未縫番埋，不過，唔少魚缸客，在過去幾日或多或少都舐到些少。
只係原來股價嘅斷裂帶，往往位處業績公佈期，無驚喜，死罪；盈利屬預期下限，死多兩成；盈利大倒退甚至轉盈為虧，而事前粒聲唔出拒發盈警，更係罪該萬死。


對 8號仔難再有感覺
好一隻傷足小股東十年心嘅 8號仔，股價雖於去年翻足一番，但係大部份長期持貨者都只係得個望字，因為當年 5合 1前高位揸得多，如今股價點樣發癲都好難再有感覺，呢個世界真係無秘密，堂堂電訊股分拆電訊業務消息如何滲漏出市場無從稽考，小記管理層明知搞緊嘢唔答得更係大家明白，相信問得呢條問題亦唔係儍仔，按本子辦事，老細話要問咪問囉，只係董事總經理艾維朗又唔需要咁唔好老皮兜口兜面一句噴向 20個記者仔，話自己唔想一陣間答 20個同類問題，就係咁，成個房間嘅空氣就突然凝固咗 5秒。
然後，有對家電視台小記就問咗一個小股東最關心嘅問題，係點解公司 2009年末期息派 13.3仙，而 2010年末期息派 10.2仙，仲有點解全年派息比率跌咗？艾總即時再發老皮，只針對第一條問題話加埋中期 5.1仙，全年派足 15.3仙，而 2009年無派中期息，但係佢就無即時答第二條關於派息比率點解由 59%跌至 55%嘅提問。照咁睇，上市公司盈利增長 27.8%、每股盈利增長亦有 24.7%，每股派息增長卻只有 15%，雖然股息率仍有 4.6厘，都唔可以好絕對咁話係增加派息，因為增加嘅只係 absolute figure，按派息比率就起碼要派多一仙多啲。
而最激氣仲係記者會上有兩件來自其他媒體之小記，竟然不約而同睥住呢位其實問得好 sensible嘅電視台小記。與此同時，肥仔見小女孩咁 down，於是「拿拿臨」打電話訂枱，實行化悲憤為食量。多謝艾維朗，帶挈我哋食咗一頓好精采美味嘅日本菜。

胡孟青
[/size]