青心直說：轉勢訊號未出現

[size=5]唔少市場中人早幾日一心以為個市跌過千點後隨時係見底訊號，明顯係忘記咗開門 7件事嘅第一件，望一下港滙就知未有運行，唔係打仗咁嚴重，睇怕真係難得有機會見日本天皇上電視發表全國講話。
然而就係因為天皇出現，市場情緒更恐慌，歐美股市跌得緊要，更有投機者將日圓鏟上新高，想發災難財，司馬昭之心簡直路人皆見，真正嘅見底訊號未出齊之前，又有邊個以為自己可以指點江山呼風喚雨，陽燭陀螺加 22000點即 250日線所在，只是一個初步似短期跌唔落及整數心理關口支持，未稱得上是買入訊號，起碼都要出番支陽燭先至講啦！
送多一個市場人士畀嘅街頭智慧予手痕兼錢多者，唔該睇睇牛證重貨區，往往都會成為重災區，呢個現時位於 22000/22100點嘅百慕達三角，隨時成為博反彈好友戰死沙場嘅亂葬崗，因為輪商已經唔夠貨賣兼要加印，呢個係每次都萬試萬靈嘅大市插水領先指標。


揸住現金睇多陣
當然，另一個可供投資者察覺大市見頂訊號係股評人帶團去旅行訊號，早兩、三年適逢炒資金自由行港股直通車之時，就係坊間最多股評家帶團去旅行之時，呢期原來又嚟咗喇！
唔好以為我咁講係有吃不到葡萄之嫌，記得當年亦有間旅運，託人搵過我，只係因為過唔到自己嗰關而連電話都無回覆對方，因為成件事嘅感覺唔係太良好，上次金融海嘯之前係咁，今次日本天災之前又係咁，世事每每就係咁巧合，唔信邪？記住呢個訊號，將來再有機會出現時，自行再引證和加以判斷吧！
當然呢個亦唔係唯一絕對可以幫助辨別大市方向的訊號，卻總可以與趨勢圖表叠埋一齊參考，即使甚麼太陽黑子活動及明日之「超級月亮」理論，大家雖然對之半信半疑，可是既然有懷疑，點解唔揸住現金睇多一陣呢，反正背後又無人逼你推你入市。

胡孟青
[/size]