青心直說：先知先覺靠北望

[size=5]每年兩會會期，都係內地上市公司掌舵人借傳媒發功嘅好機會，高層言論往往成功左右股價，然而真正可持續支持股價表現，還得靠實力和背景資金來源。全國社保基金理事會理事長戴相龍出席兩會時，就表示今年將增加 1000億元（人民幣．下同）投資，令去年 9月規模已超過 8000億元的社保基金，年底將逼近 1萬億元。
現時社保基金的股票投資佔 30%、股權及 PE（私募股權）投資佔 25%，計計埋埋，原來社保都幾進取，否則齋買定息產品的話，根本唔可以咁口響話年均投資回報目標要達 6至 10%。由於社保基金身份特殊，享有接近政策嘅優勢，佢喺股市嘅操作手影自然值得加倍關注，每當社保基金季度報告中最新建倉板塊名單曝光，往往令投資者理所當然認同為政策受惠兼防禦能力高嘅股份。


跟社保揀投資板塊
既然鳳凰無寶不落，自然會出現明星效應，佢哋委託嘅基金公司，投資取向亦成為市場焦點。例如去年第三季度，社保基金就增持新興產業如電子、醫藥及化工；去年第四季度，已開始減持高估值板塊。
內地上月底舉行咗一場全國社保基金投資管理人座談會，會上社保基金就傳達咗睇好 A股嘅訊息，反映國家對後市樂觀，安全雖是首要條件，但也不忘攻守兼備，始終係人民養老金，投資回報目標起碼要有效對冲通脹。近日所見，社保基金仍較倚重持有醫藥股，然而近期亦曾減持工行 H股（ 1398）至 17.99%，係咪一定程度反映某啲先知先覺因素，值得留神！
其次，具消費概念嘅食品飲料股亦成為社保基金最愛，似乎社保唔擔心佢哋轉嫁成本同提價能力，仲有「高送轉」即既派高息又送紅股嘅股份，連帶經營黃金開採、雞肉加工同石墨電極生產嘅龍頭也絕不放過。
香港投資者留意港股嘅同時，係時候要放眼北望，相信港人准投資 A股只係遲早嘅事。

胡孟青
[/size]