敏妮 Talk：看更伯伯投資有道

[size=5]原來政府工都唔一定係鐵飯碗，有尊貴嘅議員喺度，政府都有可能冇糧出，所以幾時都應該要有錢傍身，同埋要識得投資錢搵錢。
最近同朋友 high tea，佢話懷疑公司樓下個看更伯伯係隱形富豪，點解？「唔識佢嘅，當佢阿伯一個。
不過，同佢傾落先知，原來佢有幾叠樓收租。」話看更伯伯係隱形富豪就誇張咗啲，但朋友話，伯伯後生嗰時好鍾意過澳門賭錢，賭到身無分文。後嚟年紀大咗，唔知碰到乜嘢事令佢突然醒悟戒賭，慢慢就有啲積蓄。


熟悉附近物業　執唔少筍盤
由於呢個阿伯一把年紀，學識唔高，所以喺舊區舊樓做看更。有投資物業嘅都知，對成幢樓最瞭如指掌嘅，通常就係樓下個看更。
除咗對自己做保安嗰幢物業熟悉，佢哋對附近物業都好了解。呢位看更伯伯，就係因為熟悉做嘢附近嗰啲樓宇情況，所以執到唔少筍盤。
加上舊區舊樓，入場門檻相對較低，伯伯又唔識基金、股票，所以儲夠錢就買樓，累積買咗幾個單位。
雖然係舊樓單位，但樓價平，又唔使畀好貴嘅管理費，所以買嚟間成套房出租。
聽朋友講，伯伯買樓仲有一個特點，就係專揀二樓連平台單位。呢類「特色戶」，對伯伯嚟講好有用，因為伯伯買舊樓除咗貪平，就係貪間成套房出租夠方便。
至於有個平台，間套房時地方就見使啲，必要時將個「套廁」伸出平台，多得幾呎位得幾呎位嘛。
看更伯伯的起心肝戒賭，儲錢買樓投資，值得學習。不過，將個套廁伸出平台，咪即係僭建，犯法 o架喎，咪學！

溫敏妮[/size]